Zec 2 | NdeIBE | STEP | Ngaphakamisa amehlo – khonapho phambi kwami kwakulomuntu ophethe intambo yokulinganisa!

Zechariah 2

Indoda Lentambo Yokulinganisa

1 Ngaphakamisa amehlo – khonapho phambi kwami kwakulomuntu ophethe intambo yokulinganisa!

2 Ngabuza ngathi, “Uya ngaphi na?” Wangiphendula wathi, “Ngiyalinganisa iJerusalema, ukubona ukuthi ibanzi njalo yinde kanganani.”

3 Ingilosi leyo eyayikhuluma lami yasisuka, kweza enye ingilosi iyihlangabeza 4 yathi kuyo: “Gijima utshele ijaha leliyana uthi, ‘IJerusalema izakuba lidolobho elingelamiduli ngenxa yobunengi babantu lezifuyo phakathi kwalo.

5 Mina ngokwami ngizakuba ngumduli womlilo olizungezileyo,’ kutsho uJehova, ‘njalo ngizakuba yinkazimulo ngaphakathi kwalo.’

6 “Wozani! Wozani! Balekani kulelolizwe lasenyakatho,” kutsho uJehova, “ngokuba ngilichithachithile kuyo yonke imimoya yomine yezulu,” kutsho uJehova.

7 “Woza, yeyi wena Ziyoni! Balekani lina elihlala eNdodakazini yaseBhabhiloni!”

8 Ngokuba lokhu kutshiwo nguJehova uSomandla, uthi: “Ngemuva kokuba esengiphe udumo njalo esengithumile ukumelana lezizwe eziliphangileyo – ngoba loba ngubani oke alithinte lina uthinta igugu lakhe –

9 ngempela ngizaphakamisela isandla sami kubo ukuze izigqili zabo zibaphange. Lapho-ke lizakwazi ukuthi uJehova uSomandla nguye ongithumileyo.

10 “Memeza ujabule, we Ndodakazi yaseZiyoni. Ngokuba ngiyeza, njalo ngizahlala phakathi kwenu,” kutsho uJehova. 11 “Izizwe ezinengi zizahlanganiswa loJehova ngalelolanga njalo zizakuba ngabantu bami. Ngizahlala phakathi kwenu njalo lizakwazi ukuthi uJehova uSomandla ungithumile kini. 12 UJehova uzamthatha uJuda njengelifa abe yisabelo sakhe elizweni elingcwele njalo uzaphinde ayikhethe iJerusalema. 13 Pholani lithule phambi kukaJehova, bantu lonke, ngokuba uphakamile waphuma endaweni yakhe engcwele.”